ಗಣಪತಿ ಉತ್ಸವ ನಮನ ವೂರುಡು

ಚವುಥಿ ನಮನ ವೂರುಡು

ಕಂರ್ಬುಡು ಗಣಪತಿನ್ ತೂಪಿನ ತುಳುವೆರ್
.......................................................

ಚೌತಿ ಬತ್ತ್‌ಂಡ್. ಗುರುವಾರೊ ಜನೊಕ್ಲೆನ ಪಾಲ್‌ಗ್ ಬಾರೀ ಸಂತೋಸೊದ ದಿನ. ತುಳುನಾಡ್‌ಡ್ ಕಡಿಮೆಡ್ ಕಮ್ಮಿಯಾಂಡಲಾ ಸುಮಾರ್ 800 ಕಡೆಟ್ ಸಾರ್ವಜನಿಕವಾದ್ ಚೌತಿ ಆಚರಣೆ ಮಲ್ಪುವೆರ್. ಅವ್ವೇ ರೀತಿ ಪ್ರತೀ ಇಲ್ಲ್ ಇಲ್ಲ್‌ಡ್ಲಾ ಗಣಪತಿ ದೇವೆರೆನ ಆರಾಧನೆ ಮಲ್ಪುವೆರ್. ಸಾರ್ವಜನಿಕ ಆಚರಣೆಗ್ ಒಂಜಿ ಶಾಸ್ತ್ರೀಯವಾಯಿನ ಚೌಕಟ್ಟ್ ಉಂಡು. ಆಂಡ ತುಳುವೆರ್ ಜನಪದೀಯ ರೀತಿಡ್ ಚೌತಿ ಆಚರಣೆ ಮಲ್ಪುನೆಟ್ ವೈವಿಧ್ಯತೆ ಉಂಡು. ಒಂಜಿ ವಿಶೇಷೊನು ನಮ ಮುಲ್ಪ ಗಮನಿಸಾವೊಲಿ. ಅವು ದಾದ ಪಂಡ ತುಳುನಾಡ್‌ಡ್ ಗಣಪತಿನ್ ತೂಪಿನಿ ಕಂರ್ಬುದ ರೂಪೊಡು. ಗಣಪತಿಗ್ ಕಂರ್ಬು ಪಂಡ ಬಾರೀ ಇಷ್ಟ. ಅಂಚಾದ್ ಗಣಪತಿಗ್ ಅರ್ಚನೆ ಮಲ್ಪುನಗ ಗಳಸುವ ಸೊತ್ತುಡು ಕಂರ್ಬು ಪ್ರಧಾನ. ಅಪ್ಪ, ಕಡುಬು, ಮೋದಕ ಇಂಚಿತ್ತಿನ ತೆನಸ್‌ಲ್ ವಿನಾಯಕಗ್ ಇಷ್ಟ ಪನ್ಪಿನ ವಿವರಣೆ ಪುರಾಣೊಡುಂಡುಗೆ. ಆ ಪ್ರಕಾರ ವೈದಿಕ ಆಚರಣೆಡ್ ಇಂಚಿತ್ತಿನ ತೆನಸ್‌ಲೆನ್ ಉಪಯೋಗ ಮಲ್ಪುವೆರ್. ಆಂಡ ತುಳುನಾಡ್‌ಡ್ ಜನಪದೀಯ ಆಚರಣೆಡ್ ಕಂರ್ಬು ಬುಡ್‌ಂಡ ಬೇತೆ ಒಯಿಕ್‌ಲಾ ಮಹತ್ವ ಇಜ್ಜಿ. ತುಳುನಾಡ್ ಬುಡುದು ಬೇತೆ ಊರುಗು ಪೋಂಡ ಅಲ್ಪ ಇಲ್ಲ್ ಇಲ್ಲಡ್ ಗಣಪತಿನ ಮೂರ್ತಿ ದೀದ್ ಪೂಜೆ ಮಲ್ಪುವೆರ್. ಆಂಡ ಮೂಲ ತುಳು ಪರಂಪರೆಡ್ ಮೂರ್ತಿ ದೀದ್ ಗಣಪತಿಗ್ ಪೂಜೆ ಮಲ್ಪುನ ಕ್ರಮ ಇಜ್ಜಿ. ಅಯಿತ ಬದಲ್ ಕಂರ್ಬುನೇ ದೇವೆರ್ ಪನ್ಪಿನ ರೂಪೊಡು ಆರಾಧನೆ ಮಲ್ಪುವೆರ್.

ಕಂರ್ಬುದ ಆರಾಧನೆ ಬಾರೀ ಪೊರ್ಲುಡೇ ನಡಪುಂಡು. ಪತ್ತ್ ಪದಿನೈನ್ ಕಂರ್ಬುನು ಪೊರ್ಲುಡೇ ತುಂಡು ಮಲ್ತ್‌ದ್ ಅವೆನ್ ರಡ್ಡ್ ಪಾಲಾದ್ ತಿಗಿಪುವೆರ್. ಮಾತಾ ತುಂಡುಲಾ ಒಂಜೇ ಲೆಕ ಉದ್ದ ಉಪ್ಪುಂಡು. ಈ ತುಂಡುಲೆನ್ ಚೌಕಾಕಾರೊದ ಚೌಕುಳಿದ ರೂಪೊಡು ದೇವೆರೆ ಕೋಣೆಡ್ ದೀಪೆರ್, ಒಂಜಿ ಚೌಕುಳಿದ ಮಿತ್ತ್ ಕುಡೊಂಜಿ ದೀದ್ ಸುಮಾರ್ ರಡ್ಡ್ ಮೂಜಿ ಅಡಿ ಎತ್ತರೊಗು ಈ ಚೌಕುಳಿ ನಿರ್ಮಾಣ ಆಪುಂಡು. ಉಂದು ತೂಯೆರೆಲಾ ಬಾರೀ ಪೊರ್ಲು. ಈ ಚೌಕುಳಿದ ನಡುಟು ಗಣಪತಿಗ್ ಅರಿ-ತಾರಾಯಿ ಸುತ್ತ್ಯೆ ದೀಪೆರ್. ಕೆಲವೆರ್ ಅಯಿತ ನಡುಟು ಪಂಚ ಕಜ್ಜಾಯ ಬಲಸುವೆರ್. ಇಡೀ ಗಣಪತಿ ಆರಾಧನೆಡ್ ಈ ಕಂರ್ಬುದ ಅಟ್ಟೊಳಿಗೆನೇ ಪ್ರಧಾನ ಪಾತ್ರ ವಹಿಸುಂಡು. ಅಲ್ಪ ವಾ ರೀತಿದ ಮೂರ್ತಿ ಆವಡ್, ಮಂಡಲ ರಚನೆ ಆವಡ್ ಉಪ್ಪುಜಿ. ಆ ಕಂರ್ಬುದ ಅಟ್ಟೊಲಿಗೆಡೇ ದೇವೆರೆನ್ ತೂವೊಂದು ಅಯಿಕೇ ಆರತಿ ಮಲ್ಪುವೆರ್. ಅಯಿಕೇ ಪೂ ಅರ್ಚನೆಲಾ ಆಪುಂಡು.

ಇಂಚ ಚೌತಿಡ್ ಕಂರ್ಬುದ ಆರಾಧನೆ ನಡಪುನವು ತುಳುನಾಡ್‌ದ ಒಂಜಿ ವಿಶಿಷ್ಟತೆ ಪನೊಲಿ. ಸಾರ್ವಜನಿಕ ಗಣೇಶೋತ್ಸವೊಡು ಮೂರ್ತಿ ದೀದ್ ಆರಾಧನೆ ಮಲ್ಪುನ ಕ್ರಮ ಮಹಾರಾಷ್ಟ್ರೋಡು ಸುರುವಾದ್ ದೇಶೊದ ಬೇತೆ ಕಡೆಕ್ ಪಸರ್‌ಂಡ್. ಅಯಿಕ್‌ದುಂಬು ಇಲ್ಲ್ ಇಲ್ಲಡ್ ಗಣೇಶನ ಮೂರ್ತಿ ದೀದ್ ಆಚರಣೆ ಮಲ್ತೊಂದಿತ್ತೆರ್. ಆಂಡಲಾ ಈ ಮೂರ್ತಿ ಆರಾಧನೆ ತುಳು ಸಂಸ್ಕೃತಿಡ್ ಇಜ್ಜಂಡ್. ಅಪಗಲ ಮುಲ್ಪ ಇತ್ತಿನಿ ಕಂರ್ಬುದ ರೂಪೊಡು ಗಣಪತಿನ ಆರಾಧನೆ. ಇತ್ತೆಲಾ ಈ ಕ್ರಮ ಒರಿದ್‌ಂಡ್. ಪ್ರಧಾನವಾದ್ ನಡ್ಪತ್ತ್ ತುಳುನಾಡ್ ಬೊಕ್ಕ ಬಡೆಕಾಯಿ ತುಳುನಾಡ್‌ಡ್ ಈ ಕ್ರಮ ಎಚ್ಚಿಗೆ ಉಂಡು. ಮೂಡಾಯಿ ಬೊಕ್ಕ ತೆನ್ಕಾಯಿ ಪೋನಗ ಕಮ್ಮಿ ಆಪುಂಡು.